Miphun Kilvennak

 Miphun kilvennak ti tik ah hin Lai miphun kilvennak ti duh mi a si. Kan RAM (Lai ram) kilvennak kong aa tel lo. Lai miphun hi kan i kilven taktak a hau cang. Laimi miphun i kilven kan hauhnak a ruang cu kan tlau cuahmah ca ah a si. Zei tin dah kan tlau ti ah cun Lai holh in bia kan chim tik ah Kawl holh/biafang kan telh lengmang mi hi kan tlau cuahmah a langhnak a si. Miphun pakhat kan si ve ca ah kan tlau lai hi cu a si kho lo.

Cat`ialtu: Rev. Taan  Mang

            UN nih miphun pakhat dirhmun a khiah ning ah cun, “Amah tein ram a ngei lai, ca le holh le nunphung a ngei lai i minung an um lai,” ti a si. Kannih Laimi hi ram kan ngei, caholh le nunphung a ngei mi kan si ca ah miphun pakhat kan si ve. Kan ngeih mi hi a tlau dih bal ah cun kan Lai miphun ningpi in kan tlau ko lai. Tlau ti tik ah a minung cu kan um ko lai nain kan caholh le kan nunphung kan hman ti lo i miphun dang caholh le nunphung kan hman ah cun cu cu tlau ti mi cu a si.

            Kawl ram cozah nih, “Kawl ram ah Kawl mi lawng kan um” timi policy an i tlaih i rian an rak ṭuan ruang ah miphun dang zong kha Kawl ah i cang dih hna seh ti in an kan tuah i cawlcang kho lo in kan um. Kawl a si lo mi vialte Kawl mi ah canter dih ding an rak i zuam ruang ah a phunphun in kan cung ah hremnak an rak tuah. Kan ca cawnnak nawl an kan pe lo, sianginn ah Kawl holh a thei bal lo mi taang cheu hmanh kha Kawl holh in ca nan chimh hna lai tiah saya/ma pawl kha an ti hna. Kawl biaknak nan biak ve ah cun nan rian kan in kaiter hna lai, tiah cozah rianṭuan pawl zong an ti hna. An duhnak cu an holh hi thlau dih hna sehlaw Kawl holh lawng thiam hna seh, hmang hna seh, Kawl biaknak ah lut dih hna seh, ti duhnak a rak si. Mah holh thiam ti lo in Kawl holh kan hman i an nunphung in kan nun ve, an biaknak kan biak ve ah cun Kawl ah kan i can a si ko cang.

            Cucaah Kawl cozah nih an kan sersiam ning in/an duh phun tein Kawl holh in kan holh, an hla le an nunphung kan uar, kanmah holh kan philh thluahmah. Hi hi cozah nih an kan sersiam ning in kan va si khi a si. Atu, Laiholh in kan holh hmanh ah Kawl holh tam tuk kan telh cang mi hi zeimawzat kan tlau cang a langhnak a si.

Ram le miphun a daw i a kilveng mi kan pale le mino cheu khat cu bia an chim ah Kawl holh le miphun dang holh telh lo tein biachim an i zuam. Ca an ṭial ah kan Laiholh biafang an kawl i an hman. Kan Laiholh ah a um rih lo mi hmanh kan Laiholh in an ser i, cu cu an hman. Hi hi ram le miphun an dawt i an runven a si.

             Khrihfa biaknak hi Laimi miphun pakhat kan sinak a kan rungvengtu a rak si. HBA nih kan Baibal le Khrihfa Hla cauk hi biatak tein a rak i hmaithlak i a rak ṭuan. Hawi hnu cun HBA cu association tam nawn in a hun i ṭhen i HBA lawng nih Baibal le Khrihfa Hla cauk cu ṭuan awk a ṭha ti lo. Cucaah 1988 April 24, Immanuel Baptist Church, Hakha ah Rev. Hrang Mang hohaknak in kan pale nih atu CACC khi an rak dirh. An rak dirh ka ah cun CA rianṭuannak ca lawng ah rak ruah a si nain hawi hnu cun nunphung, fimthiamnak le ṭhanchonak tiang hun ṭuan a si. CACC hi Hakha, Matupi le Thantlang peng ca ah cun miphun i runvennak ca ah kan i ngeih mi bu pakhatte a si. CACC zong cu Khrihfabu nih dirhmi a si ca ah Khrihfabu hi Laimi miphun a kan runvengtu tiah kan ti khawh.

            Zei ruang ah dah Khrihfa biaknak nih Lai miphun a kilven ti ah cun Khrihfabu tluk in rian a ṭuan kho mi bu a rak um lo i atu tiang zong ah Kawl ram ah cun a um rih lo. Cun ralkap cozah cu rak puarhrang tuk hna kaw Khrihfabu in ti dah lo cu rak hrem le thong rak thlak a si tik ah ca le holh, nunphung rianṭuannak cu ṭuan ngam a rak si lo.

            Ho nih dah hi rian hi a ṭuan ding a si ti ah cun cozah nih a ṭuan ding a si. Kan Lairam cozah hi a ṭhat ah cun kan Lai CAHOLH le NUNPHUNG cu anmah nih an tlaih te ding a si. An ṭhanchoter ding a si. Asinain bochan khawh an si lai le si lai lo aa fiang rih lo. Bochantlak an si hnu zong ah caan sau nawn cu zoh ta an hau te lai. Cucaah CACC nih caholh le nunphung hi sau nawn a tlaih a hau rih ko lai. Cu leng ah Biaknak lei he aa pehtlai mi Baibal, Khrihfa Hla cauk, Sunday Church School cauk le Khrihfa cauk phunphun chuahnak hi cu ṭhawng chin in a ṭuan a hau te ko lai.

            Miphun pakhat kan sinak hi kan caholh le nunphung in dirpi a hau. Thazaang in dirkamh khawh a si lo. Cucaah kan nunphung le caholh hi zei tin dah kan sersiam lai ti hi ruah ngai a hau. Miphun dang holh le nunphung kha kan nunphung chung ah kan luhter ahcun miphun dang nih an kan nihsawh te lai. Kan Laiholh ah Kawl biafang le Mirang biafang tam tuk kan telh ah cun, “Hi ma nan Laiholh? Kawl/Mirang biafang pei a si ko hi,” tiah an kan ti te lai i kan ningzak te lai. Cucaah kan holh zong hi kan Lai kokek biafang a si a hau i kan nunphung zong hi kan Lai kokek a si a hau. A hlei in pumpak cio nih bia kan chim tik ah miphun dang holh telh lo in bia chim khawh i zuam cio hna usi law kan Laiholh in hngalh ti lo mi cu Mirang holh tu hmang te hna usi.

By

Rev. Taan Mang